انہدام

انہدام

اب   اعتماد  جگاؤ  وفا  کی  بات  کرو 

رگوں سے زہرنچوڈو  دواکی بات کرو

یقیں دلاؤ کہ جرم و سزا کی بات   کرو 

                                 وہ سانحہ جسے ہونا نہیں تھا ہو بھی چکا

                                  لہو کا سیل رواں شہر کو ڈ بو بھی  چکا 

بہت  غنی  ہیں  اخوّت کے  چاہنے والے

خموش  رہ  کے ستم  کو سراہنے  والے

یہ ظلم و عدل سے یکسا ں نباہنے  والے 

                                 ہمارے عہد میں چارہ گران غم ٹھہرے

                                    فریب خوردہ نگاہوں میں محترم ٹھہرے 

اداس چہروں سے جذبات کی نمائش کیا

عمل کے بعد یہ رد عمل کی خواہش کیا

ہمارے  ضبط  مسلسل  کی  آزمائش  کیا 

                               پڑے گی ضرب تو آئینے ٹوٹ جائیں گے

                               یہ ریزہ ریزہ چبھیں گے لہو رلاییں گے 

یہ  مانا شام غریباں ہے صبح عید  نہیں

مگر  یہ  وقت پلٹ جاۓ کچھ  بعید  نہیں

ہم اب بھی ارض مقدّس سے نا امید نہیں 

                                شب  سیاہ   کا   جاد و   ضرور   ٹوٹے   گا

                               انھیں اندھیروں کے دامن سے نور پھوٹے گا

                                                              عامر ریاض

.....ایک تنہا نظم

تنہائی کے جنگل میں  

ٹھہرے ہوئے اک پل میں

جب درد پگھلتا ہے 

احساس کی شاخوں پر

مدّت سے تھما پانی

حولے سے نکلتا  ہے

دل چیر کے پربت کا

پتھر سے ابلتا ہے

راہوں میں پھسلتا ہے

گرتا ہےسنبھلتا  ہے

پھر نیل  کی چادر پر 

کچھ دور یونہی چل کر

سو جاتا ہے پانی میں 

دریا کی روانی میں

کچھ نقش ابھرتے  ہیں

صدیوں کے نشاں پل میں

بنتے ہیں بکھرتے ہیں

ہر روز یہ ہوتا ہے 

.....تنہائی کے جنگل میں

  عامر ریاض   

ہندوستان کا الیکٹرانک میڈیا خاکی ہاف پینٹ میں

ہندوستان کا الیکٹرانک  میڈیا خاکی ہاف پینٹ میں  

انا ہزارے کی تحریک سے اورکچھ  ہوا ہو یا نہ ہوا ہو مگر فرقہ پرست تنظیموں کو یہ بات اچھی طرح سمجھہ میں آ گئی ہے کہ ہندوستان کی ٩٩ فی صد ٹی وی چینل آر ایس ایس کے رضا کار ممبر ہیں اور مہاتما گاندھی کے طرز پر کسی طرح کی تحریک چلانے یا مظاہرہ کرنے پر انھیں مفت میں ایسا  میڈیاکو ریج حاصل ہو سکتا ہے جو کروڑوں روپے خرچ کرکے بھی حاصل نہیں کیا جا سکتا-مودی کے اپواس پر میڈیا چینلس کی فریفتگی تو کم از کم یہی اشارہ کرتی ہے -حال ہی میں امریکا کی تعریف اور سپریم کورٹ کے رویے سے مسرور مودی اور اسکے حامیوں نے مودی کو اپواس پر بیٹھانے کا جو ڈرامہ شروع کیا ہے وہ صیہونی طاقتوں کی اس بڑی سازش کا حصّہ ہے جو ہندوستان کے اپر کاسٹ ہندوؤں ،فرقہ پرست تنظیموں اور متسصب ٹی وی چینلوں نے مشترکہ طور پر تیارکی ہے-

یہ ایک ناقابل تردید حقیقت ہے کہ اپر کاسٹ ہندو مودی کو قاتل نہیں بلکہ اپنا ہیرو مانتے ہیں، ٹھیک اسی طرح جیسے ہٹلر کوبہت سےغیر یہودی طبقےقاتل کے بجاۓ ہیرو تسلیم کرتے رہے ہیں-اپر کاسٹ ہندوؤں کی ایک بڑی تعداد مودی کو مسلمانوں کی مبینہ دہشت گردی سے نمٹنے کا ایک آلہ سمجھتی ہے, یا کم از کم مسلم قوم کو دبا کر رکھنے کی لئے مودی جیسے فاستاییوں کے وجود کو برقرا ر رکھنا ضروری سمجھتی ہے-ہندوستان کے  الیکٹرانک  میڈیا میں آج بھی بڑی تعداد ایسے ہی عناصر کی ہے -انا کے معاملے سے انھیں یہ اندازہ بھی بخوبی ہو چکا ہے کے خواہ ہندوستان کے کروڑوں عوام کچھ بھی سوچتے ہوں مگر میڈیا کے ذریعے چند ہزار لوگوں کو سارے ہندوندستان کا نمائندہ بنا کر پیش کیا جا سکتا ہے-

مودی نے اپنے اپواس کے لئے جو اسٹیج تیار کیا ہے اسکے پس منظر میں گاندھی جی کی بہت بڑی تصویر لگائی گئی ہے-گاندھی اور مودی کے اس غیر فطری اشتراک کو دکھانے میں الیکٹرانک  میڈیا نے کوئی کور کسر باقی نہیں رکھی ہے -سارے ٹی وی چینل فدائی غلاموں کی طرح ملک کی تمام خبروں سے چشم پوشی کرکے صرف اور صرف مودی کی خِدمَت میں لگے ہیں اور موجودہ دور کے ا س فرعون اعظم کی ایک ایک حرکت کو منظر عام پر لانے کا قومی فریضہ انجام دے رہے ہیں-

یہاں دو باتیں ذہن میں رکھنا ضروری ہے -پہلی یہ کہ سپریم کورٹ نے مودی کو بے گناہی کا سرٹیفکیٹ نہیں دے دیا ہے ،صرف ان معاملات کو ٹرائل کورٹ میں حل کرنے کی ہدایت دی ہے -دوسری بات یہ کہ امریکا کی جانب سے مودی کی تعریف ایک قاتل کی دوسرے قاتل کی تعریف کے مترادف ہے با لکل ویسے ہی جیسے ابو جہل ابو لہب کی تعریف کرے-

بہر حال میڈیا کا یہ خاکی رول ہمیں اس بات کی یاد ضرور دلاتا ہے کہ مسلمانوں کو اپنی آواز اٹھانے کے لئے سنجیدگی کے ساتھہ اپنا میڈیا قائم کرنے کی کوشش کرنی چاہیے-

مولانا احمد رضا خان کی ایک نادر تخلیق

یہ نعت ماہنامہ زاویہ لکھنو ،مارچ ٢٠٠٩ میں شایع ہوئی تھی -یہاں مذکورہ رسالہ کے متعلقہ صفحات کا عکس شایع کیا جا رہا ہے -عامر     

l

                                               ایک غزل     ذکیہ جعفری کے نام

تمام شہر تو پابند  ہے گواہی   کا

کسے یقین دلاؤ گے بے گناہی کا

ہماری آنکھہ سے دنیا نے روشنی پائی

ہمیں پھ جرم بھی عائد ہے کم نگاہی کا

ضمیر بک گیا دنیا نہ مل سکی پھر بھی

عذاب یوں بھی ہوا کرتا ہے الہی کا

کبھی تو رات کے سینے سے نور پھوٹے گا

کہیں  تو ٹوٹے  گا یہ  سلسلہ  سیاہی  کا

وہ جنکے فیزے کرم سے عذاب اتراتھا 

انھیں بھی رنج ہے عامر مری تباہی کا

ایک نظم قائدین ملّت کے نام

شاہین 
   

تمہارا عبقری شاہین 

بے کران آسمانوں اور سنگلاخ چٹانوں سے

قصر شاہی کے گمبد زر نگار میں 

 لوٹ آیا ہے 

کہ یہاں رزق کی فراہمی ہے

پرواز جیسے کار فضول سے فراغت ہے

نشیمن کے لئےسی 

 نہیں کرنی پڑتی

شاہین بے پروا 

اب مزے میںدن کاٹتا ہے

کبھی لہو گرم رکھنے کی حاجت ہو

 تو

                           سفید فاختاؤں کے بدن چاٹتا ہے         عامر ریاض

دبستان اردو

تمام اردو دوستوں کی خدمت میں آداب ،دبستان اردو میں آپ سب کا خیر مقدم ہے .  یہ ویب سائٹ تمام اردو دوستوں کے نام ہے.آپ یہاں اپنی تخلیقات،خیالات،اردوسے متعلق خبریں براہ راست اردومیں نشر کر سکتے ہیں . اگر یہاں موجود کی بورڈ آپکی مدد نہ کرے تو آپ رومن(انگریزی) اردومیں اپنے تاثرات تحریر کر دیں ،ہم اسے اردورسم الخط میںتبدیل کردیں گے   ..شکریہ ...عامر ریاض .